1: Ye Olde Bull's Head Inn.

Yn Ôl

Cyflenwyr Arbenigol ym Môn

Ye Old Bull's Head Inn.

Mae'r bwyty Ye Olde Bull's Head wedi ei leoli yn nhref hardd Biwmares sydd yn nghwr de-ddwyreiniol yr Ynys. O draethau Biwmares ceir golygfeydd ardderchog o Afon Menai ac Eryri - golygfeydd a ystyrir gan lawer yn olygfeydd godidocaf Ewrop. Mae bwyty'r Bull yn dyddio yn ôl i 1472 ac yma yr oedd safle gwreiddiol yr Ebrandy gwreiddiol (gorsaf y Goets Fawr) yn y fwrdeisdref, a rhyw ganllath, fwy neu lai, oddi wrth y bwyty hwn saif Castell Biwmares a adeiladwyd yn 1295 gan Edward I. Yn 1645, cymerwyd meddiant o'r dafarn hon gan y Cadfridog Mytton o fyddin Cromwell tra'r oedd ei filwyr yn gwarchae'r castell.
Roedd y Dr Samuel Johnson a'r nofelydd Charles Dickens ymhlith y gwesteion enwog a fu'n aros yn y dafarn yn ygorffennol. Gyda thân coed mawr yn eich croesawu yn y lolfa, a'r ystafelloedd gwely i gyd yn cynnwys baddondy 'en-suite' ac wedi eu haddurno'n wahanol i'w gilydd, bernir bod y gwesty hwn yn gyrchfan boblogaidd iawn.

Llwyn Porc wedi ei ffrîo gyda Brandi, Bricyll a Hufen.
Ar gyfer pob person:
8 owns o Lwyn Porc
2 owns o Fricyll sych
wedi eu mwydo a'u haneru
2 owns hylifol o Frandi
2 owns hylifol o Stoc Cyw Iar
wedi ei leihau'n dda
3 owns hylifol o Hufen Dwbl
Pupur a Halen

Tynnwch y cig gwyn a'r gôau i gyd i ffwrdd a thorrwch y cig yn sleisys o ryw owns i owns a hanner yr un. Ffrîwch hwy mewn padell ffrîo nes byddant wedi brownio. Tywalltwch y saim i ffwrdd. Ychwanegwch y brandi a rhowch fflam arno. Diffoddwch y fflam drwy roi caead ar y badell.
Ychwanegwch y stoc a gadewch iddo ferwi nes y bydd wedi lleihau i fod bron yn ddim. Ychwanegwch yr hufen a'r bricyll, ac yna'r pupur a'r halen. Berwch y cwbl nes bydd yr hufen wedi tewychu. Ychwanegwch ddarn o gorbwmpen (courgette) wedi ei ddeisio er mwyn rhoi lliw. Serfiwch gyda reis brwysiedig.
Reis brwysiedig:
Toddwch 1 a ½ owns o fenyn mewn padell ffrîo. Ychwanegwch hanner nionyn a falwyd yn fân, a choginiwch ef am ryw funud neu ddau heb adael iddo frownio. Ychwanegwch ddiferyn o ddwr ato os bydd angen. Ychwanegwch gwpanaid o reis grawn hir a deilen lawryf ('bay leaf') a'u coginio am 2-3 munud. Ychwanegwch 2 gwpanaid o stoc cyw iar ac ychydig o bupur a halen. Codwch y cymysgedd i ferwi ac yna'i roi yn y popty am 17 munud. Llaciwch y reis efo fforc i'w ysgafnu.